كيف الحال

صوت جميل

2011-08-18T11:53:00.000+02:00

ف الميدان

2011-07-09T15:06:00.002+02:00

دقت الساعة القاسية
وقفوا فى ميادينها الجهمة الخاوية
واستداروا على درجات النصب
شجراً من لهب
تعصف الريح بين وريقاته الغضة الدانية
فيئن: "بلادى .. بلادى"
(بلادى البعيدة!)
… … …
دقة الساعة القاسية
"انظروا .."؛ هتفت غانية
تتلوى بسيارة الرقم الجمركى؛
وتمتمت الثانية:
سوف ينصرفون إذا البرد حل.. وران التعب.
… … … … …
دقت الساعة القاسية
كان مذياع مقهى يذيع أحاديثه البالية
عن دعاة الشغب
وهم يستديرون؛
يشتعلون – على الكعكة الحجرية – حول النصب
شمعدان غضب
يتوهج فى الليل..
والصوت يكتسح العتمة الباقية
يتغنى لأعياد ميلاد مصر الجديدة!

"الكعكة الحجرية"

امل دنقل

شعار زيزي

2011-06-22T14:31:00.002+02:00

فوجئت بزينب - ابنة اختى ذات الثلاث سنوات - أثناء احداث الثورة وفي أوجها تهتف بحماس

الشعب يريد إسكار النظام

والله فكرة!!!

حب الآخرين

2010-10-26T15:19:00.002+02:00

"حب الآخرين لنا عبارة عن نقاط متباعدة। نحن الذين - نحتاج لهذا الحب - نصل بين تلك النقاط المعزولة। ربما لا تسعفنا امكانياتنا ، أو حياتنا القصيرة لنصل بينها ولكن علينا ان ننثر تلك النقاط في طريقنا أو على الأقل نبحث عنها ، وسيأتي من يكتشف هذا الرابط بينها ، وتنفتح أمامه تلك الخريطة التي رسمناها بدون أن ندري ، لأننا أبناء لحظة واحدة। لا أعرف ما هي حقيقة الحب ، ولكني أعرف بأننا يمكننا أن نحب ونُحب كلما تواضعنا في رؤية أنفسنا ورؤية الآخرين।"

علاء خالد

((الم خفيف كريشة طائر تنتقل بهدوء من مكان لآخر))

اول مرة

2010-04-11T16:23:00.003+02:00

في يوم ممطر دافئ اشعر بسعادة ، نعم انا سعيدة ، سأترك البيت للمرة الأولى ، نعم سأسافر ، سأركب الطائرة ، سأرى المطار ، سأكون وحدي أخيراً...
تحركت السيارة من البيت إلى المطار وأنا أفكر في شئ واحد (الطائرة) كيف سأتعامل مع هذا الاختراع لأول مرة في حياتي؟
وصلنا ، ودعت اخي ، انتهت اجراءات المطار ، جلست انتظر - فقد ذهبت مبكرا جداً خوفا من أن تفوتني الطائرة - كان الانتظار مملاً وطويلاً إلى أن جاءت اللحظة : تعلن شركة مصر للطيران عن قيام رحلتها رقم ...... انها هي طائرتي ، دخلت ، اجراءات اخرى ، مش مهم الآن سأركب। رأت المضيفة اوراقي اشارت لي ان مقعدي بجوار الشباك ، مش معقول!! سألمس السماء।
جلست مرتبكة فهي اول مرة لي في طائرة ربطت حزام الامان ، تحركت الطائرة ، لم أخف ، ليست صعبة كما قالوا لي ، سارت كثيرا ثم فجأة بدأت تطير ، أصبحا معلقة في الجو ، احساس رائع، كان الجو يمطر بغزارة ، والطائرة ترتفع ، وترتفع ، والمطر غزير ، فجأة استقرت الطائرة فوق السحاب وكانت الشمس بجواري ولم اشعر بحركتها بعد ذلك كل ما كنت افكر فيه ان المطر تحتي।
وصلت ، انا وحدى ، الآن سأضطر للتصرف بمفردي !! وهو شئ ليس سهلا خاصة وانا لم اسافر بمفردي - لمسافات طويلة -من قبل ، مش مهم هاتصرف ركبت وصلت إلى الفندق ، حجرة صغيرة ولكن بها سريرين وانا وحدى ، فكرت : اليوم سأنام هنا وغدا على السرير الآخر ، وما المانع فأنا وحدي على ايه حال। في الصباح فوجئت بأن النافذة تطل على جبل تنحدر عليه البيوت في منظر رائع ، وااااو مش بنشوف دا عندنا ليه؟
من سعادتي كدت انسى السبب الرئيسي للسفر ، عموما وفقنى الله في مهمتي ، ومرت الايام سريعا ، وجاء الموعد المنتظر ، الرحيل وركوب الطائرة। اخذت تاكسي للمطار ، انتهت الاجراءات ، سألتني موظفة المطار هل تريدين مقعدك بجوار الشباك ؟ قلت طبعاً....
ركبت الطائرة ، كانت السادسة مساءً وكانت تمطر بغزارة ايضاً ، والغيوم كثيفة ، والظلام مخيف فجأة مرة اخرى عندما استقرت الطائرة فوق السحاب فوجئت بالقمر بدراً وبجواري ، ضوئه ينعكس على جناح الطائرة شعور غريب مش عارفة اوصفه كنت سعيدة جداً ، انا بجوار القمر (جارة القمر) !!!!
مر الوقت سريعا وانتهت اول واهم رحلة في عمرى ، وعندما وصلت فكرت : السفر مش شئ مستحيل اوي ، يمكن محتاج فلوس بس مش مستحيل। تجربة مميزة اتمنى تكرارها ، ولم لا ؟ مادام في العمر بقية هناك دائما فرصة ....
عذرا للاطالة فهي اول مرة اركب طيارة .... وحدي

الفعل

2009-06-27T15:54:00.001+03:00

سيف اللاجدوى

يهوى ما بين الرغبة والفعل

صحراء اللافعل

تتمدد ما بين الرغبة والجدوى

صلاح عبد الصبور

انا هنا

2009-06-07T10:18:00.003+03:00

لقد مر قرابة الشهرين لم اكتب او ادخل لاتابع المدونة لاسباب كثيرة لا مجال لذكرها الآن ولكن الاكيد ان بعضها خارج عن إرادتي ، لكن ما الذي دفعنى اليوم للكتابة؟؟ اولاً لأني افتقدت عالم التدوين ، وثانيا ربما لاني نظرت الى تاريخ اليوم فوجدته 7 يونيو ذكرى النكسة ، ربما أنا لم أعش هذه اللحظات او المشاعر ولكن هذه الذكرى قد أعادت إلى ذهنى حادثة صدمتنى انا شخصيا كمدرسة حدثت لي منذ اسبوعين تقريباً عندما كنت اراقب في احد الامتحانات في المدرسة التي اعمل بها وبعد انتهاء الامتحان وخروجنا انا وزملائي فوجئت بولي أمر طالبة جاء يقول : أبلة سميرة ؟؟ قلت نعم أي خدمة؟؟ قال: لماذا تشددين على الطلبة هكذا ؟ نحن نعاني من ظروف اقتصادية صعبة وأضاف: خِفي شوية ع العيال... وجاء آخر وقال لي : علشان ربنا رزقك بشوية صحة هاتفتري على العيال. هكذا بالنص ، حدث لي ذهول ولم أرد عليهما وتولي زملائي شاكرين هذه المهمة نيابة عنى. رجعت إلى البيت وفي رأسي اسئلة كثيرة ليس لها اجابة ، هل اصبح منع الغش افتراء وظلم؟ هل انا مفترية وظالمة؟ لا انا لست ظالمة كلنا ظروفنا الاقتصادية صعبة ولكنها ليست مبرر لهذا الانهيار في القيم او يمكن هي سبب لانهيار اشياء كثيرة. ما احزنني حقاً ان يأتي ولي الامر ويطلب منك كمعلم ان تسمح لابنه بالغش ويحاول اقناعك بأنك ظالم ومفتري ان لم تفعل !!! لماذا لا تطلب من ابنك ان يجتهد ويحاول ويقاتل لكي يصل ؟؟؟

لكن بعد ان هدأت وفكرت قلت وما العجب في ذلك ان كان هذا حال الدنيا كلها؟ انا التي تفكر بطريقة رومانسية حبتين. ولكن اجمل ما في الموضوع وما اسعدني حقاً انه في اليومين الباقيين في الامتحانات لم ادخل اي لجنة امتحانات لأراقب إلا في الرسم يعني إدارة المدرسة بيريحوني لإني تعبت في الايام اللي فاتت او يمكن اعتباره ضغط الرأي العام على إدارة المدرسة.

سؤالات

2009-04-09T22:13:00.002+02:00

ياما صادفت صحاب وما صاحبتهمش
وكاسات خمور وشراب وما شربتهمش
أندم علي الفرص اللي انا سبتهم
والا علي الفرص اللي ما سبتهمش
عجبي !!

*********************

يا باب يا مقفول ... إمتي الدخول
صبرت ياما واللي يصبر ينول
دقيت سنين ... والرد يرجع لي : مين ؟
لو كنت عارف مين أنا كنت أقول
عجبي !!!

صلاح جاهين

فـــرح

2009-03-11T06:54:00.003+02:00

هي : العروسة
جميلة ، رقيقة ، ابتسامة طفلة بريئة بها بعض الحزن ، صغيرة ( لم تكمل 16 سنة ) ، فقيرة !!!

************************

هو: العريس
يرقص سعيداً ، فهو ربما في الخمسين او اصغر قليلاً . ( ثري عربي ) !!!

************************

المدعوين : قلة ( اقارب العروسة فقط )
يتصارعون للحصول على الجاتوه والعصير !!!

************************

أنا : ( !!!!!!!!! ) أصفق
........
فرح

الأمان

2009-02-12T10:14:00.002+02:00

منذ فترة تطاردني أفكار كثيرة عن ماهية الشعور بالأمان ، أو بمعنى أدق ماذا لو فقدت الأمان؟؟
رتبت أفكاري ، وحاولت كثيراً أن أفتش في قاموسي اللغوي عن تعريف "جامع مانع" لكلمة (الأمان) فلم أجد ما يساعدني كثيراً. لقد كان أكثر ما يشغلني هو ماذا لو فقدت الشعور بالأمان؟ لست أدري فلم أختبر هذا الشعور من قبل ، أو ربما اختبرته مرة ، ولكن اتخيلني في غرفة مظلمة وانا منزوية في ركن منها وارتجف بالرغم من عدم شعوري بالبرودة ويتملكني شعور رهيب بالخوف ، هذا ما تخيلته عن (عدم الأمان).
لا أريد ان اتحدث عن الشعور بالامان من الناحية السيكولوجية لاني لا املك الادوات التي تؤهلني لهذا. ولكن ما يدهشني حقاً هو هذا الاحساس او ربما هذه القوة الكامنة التى تمنحك الثقة لان تسير ، تدخل ، تخرج ، تقول ، تفعل ، او حتى تعبث دون خوف او قلق او اضطراب. هل معنى هذا ان كلمة "امان" ترادف الشعور بعدم الخوف ؟ ، وهل يا ترى الاحساس بالامان احساس اصله فسيولوجي في "الجينات" وتعززه البيئة المحيطة ؟؟ ، ام البيئة وحدها هي التي تلعب الدور الاول والاخير في ترسيخ هذا الشعور ؟؟ وهل حقيقي ان الوالدين هما المصدر الاول "للامان" ؟ وماذا عن الذين لم يعرفوا الاسرة ، هل يكون شعورهم الامنى مختلف ؟ وماذا عن الذين يعيشون وسط اسرة مثالية ولكن في حالة حرب مستمرة ، او تحت الحصار ، او اي شكل من اشكال القهر؟؟
وماذا عن الذين فقدوا الشعور بالامان في صغرهم ، بم سيحاولون تعويض هذا الشعور في الكبر ؟ بالحب ، بالمال ، بالارهاب ، او ربما بالقتل !!! وماذا عن علاقة الامان بالسعادة وايهما نتاج الاخر؟؟
اسئلة كثيرة دارت في عقلي ، بعد تفكير وجدت لبعضها اجابات منطقية ولكن لم استطع الوصول لاخرى. ربما الموضوع ليس بهذه الاهمية التي اطرحها لانه شعور بديهي وافتراضي لدينا جميعاً ، لكن ماذا لو فقدناه؟؟!!!

بدون عنوان

2009-02-04T07:38:00.002+02:00

ياااه وحشنى التدوين وعالم المدونات ، فأنا لم اكتب جديد منذ فترة ودا لاننى كنت مشغولة اليومين اللي فاتوا في المراقبة والتصحيح وخلافه - متاعب المهنة - ، وكمان في اسبوعين الاجازة فيه تدريب يومياً. كل دا خلاني احس اني فصلت خالص عن عالم التدوين ، فقلت اكتب بوست كدا سريع خفيف ع الماشي احاول ارجع بيه للتدوين مرة تانية واتواصل مع الاصدقاء الاعزاء اللي بيشرفوني بتعليقاتهم الجميلة. وكمان عاوزة اقول انه بالرغم من الارهاق البدني اليومي اللي انا فيه حيث الاستيقاظ في السابعة صباحا والعودة للمنزل في الخامسة مساءاً وفي اوقات كتير بعد كدا كمان ، وطبعا بعد الغدا فيه جدول يومي للمذاكرة ، بقول بالرغم من كل هذا الارهاق الا اني سعيدة بهذا الانشغال وكل هذه اللخبطة ، احساسي اني كل يوم بقوم من النوم وعارفة اني وراية مليون حاجة بالنسبة لي شئ جميل ، لان الاحساس بالفراغ والملل شئ مرعب بالنسبة لي وبطبعى انا بحب العمل لانه بيكون في اوقات كتير اهم مصادر سعادتي ....
ياللا كفاية كدا كلام ، بتمنى لكم اجازة سعيدة

سنة جديدة

2009-01-10T17:08:00.006+02:00

وانا قاعدة مع نفسي في غفلة من الزمن قلت: احنا خلاص بقينا في 2009 ؟؟

يااااه الايام بتمر بسرعة - كلمة معتادة الناس بتقولها في الموقف دا مع ان الايام بتمر في كل الاحوال -

يا سلام لو اضع خطة استراتيجية مستقبلية للسنة الجديدة ، توكلنا على الله....
رجعت قلت انا فاشلة في حكاية الخطط دي ، طب ما انا احاول اتخلص م الحاجات اللى اللي مضايقاني في حياتي ومنغصة على عيشتي ...
بس اولاً: لازم اعرف ايه هي الحاجات دي وبعدين احاول اتخلص منها ....
طب خلاص انا عرفتها ، وبعدين ؟؟!!
اتخلص منها - دا الطبيعي - ، هو دا بسهولة كدا !! يعني اقولها تمشي فتروح ماشية على طول ...
لأ طبعاً ، الموضوع عاوز (تكتكة) ، يعني هانرجع للخطط تاني !!!!!
ش مهم ، الاهم انى اتخلص منها للآبد.
خلاص اتخلصت من كل السلبيات في حياتي - بتخيل -
ابدأ بقى في تعزيز الايجابيات ، يعني انا عاوزة اعمل ايه في السنة الجديدة؟؟؟
برضه لازم خطط واستراتيجيات!!!

أيوه ما الواحد لازم يخطط علشان ينجح

بس .... برضه فيه حاجات بتيجي كدا من غير خطط ولا حاجة

حاجات رباني يعني...

مافيش اعتراض ، بس المهم اني مااعتمدش ع الرباني واسيب الاسباب التي تؤدي الى تحقيق النجاح - فلسفة جامدة -

انتوا عارفين ؟؟ نفسي اعمل حاجة مجنونة في السنة الجديدة ، حاجة مختلفة ، تخليني مبسوطة فوق في السحاب ...

بس ايه هي الحاجة دي ؟؟؟؟

النجاح؟

احتمال !!

بس النجاح برضه عاوز نخطيط....

ماهو لازم تخطيط

يمكن الحرية ؟؟؟

طب يعني ايه حرية ؟؟؟؟

يمكن الحب ؟؟

الحب .... !!!!!

............

انا خلااااص دماغي (هنج)

اقولكم ...

كل سنة وانتوا طيبين

اهو انا؟

2008-12-11T20:00:00.004+02:00

أو كان الصبي الصغير انا؟

أم ترى كان غيري؟

أحدق

لكن تلك الملامح ذات العذوبة

لا تنتمي الآن لي

والعيون التي تترقرق بالطيبة

الآن لا تنتمي لي

صرتُ عني غريباً

ولم يتبق من السنوات الغريبة

إلا صدى اسمي

وأسماء من أتذكرهم - فجأة -

بين أعمدة النعي

أولئك الغامضون : رفاق صباي

يقبلون من الصمت وجها فوجها فيجتمع الشمل كل صباح

لكي نأتنس

من قصيدة "الجنوبي"

أمل دنقل

وجوه عديدة للحقيقة

2008-11-15T09:43:00.004+02:00

أين هي الحقيقة؟؟؟

سؤال محير ظل الكثيرون يحاولون الوصول لإجابات شافية له ولم يصلوا ، وهناك مَن ضل الطريق. حتى أنني قد قرأت مرة مقولة تعبر عن هذه الحيرة لفيلسوف يقول فيها :

"ركعت وسجدت عند قدمي معشوقتى وانتظرت طويلا ، وطويلا على ان تجود على بكلمة ، ولكنها لم تقل إلا قليلا ..... أما هذه المعشوقة فهي الحقيقة".

لا يستطيع أحد أن يجزم أنه يملك الحقيقة كاملة حول موضوع واحد. فكل واحد منا له رؤية مختلفة حول نفس الموضوع ، فالقمر مثلا يراه العشاق والشعراء مصدر إلهام ووحي لكلمات جميلة ، وحتى أنه رمز للجمال في كثير من الأحيان - قمر 14- ونفس هذا القمر في نظر علماء الفلك ، أو من يملك تليسكوبا بسيطا هو مجرد صخور جامدة لا توجد بها حياة ... فأين الحقيقة إذن ومن يملكها ؟؟؟!!!!

حتى هذا القمر من وجهة نظرنا جميعا - على ما اعتقد - بالرغم من معرفتنا أنه مجرد صخور ، إلا أننا جميعا نشعر بالسعادة عند رؤية القمر ليلة التمام ، فأي القمرين نصدق...

في رأيي أن هذه الحيرة حول معرفة الحقيقة شئ مهم وحيوي في حياتنا ، لأنه لو خرج شخص ما وقال أنا أملك الحقيقة حول شئ ما ، فماذا سنفعل ؟؟؟ سنكتفي بهذا وسنلغي عقولنا ولن يكون هناك ابتكار وابداع أو تطور ، فلماذا إذن نحتاج إلى مبدعين ومفكرين وعلماء إذا كنا نملك الحقيقة كاملة ؟؟؟

من المهم أن نفكر ونبتكر ونتطور وألا نلغى عقولنا كي نحاول الوصول إلى الحقيقة - إن استطعنا - لكي نشعر بآدميتنا ووجودنا وتطورنا.

2008-10-24T09:31:00.006+02:00

تلميذاتي

شعور جميل يغمرني وأنا أخرج من الفصل بعد أن أعلن الجرس انتهاء الحصة ، وأنا أشعر بطالباتي وقد استوعبن ماقلت وشرحت أثناء الدرس ، يا له من نجاح.....

تلميذاتي مصدر من مصار سعادتي ، لأنهن يؤكدن نجاحي في عملى بالرغم من فشل نظامنا التعليمي...

انظر إليهن وهن يتنافسن في الإجابة ، أو المزاح ، أو المناقشة ، وما الأحظه كثيراً ويسعدني بأن لهن موقف ورأي ويستطيعن مجادلتي في موضوعات كثيرة بالرغم من صغر سنهن النسبي ، ربما أرى فيهن ما كنت أحب أن أكونه وأنا في مثل سنهن ....

لقد صادفت في سنوات عملى - القليلة - كمدرسة كثير من المواهب والطاقات الجيدة والتي تحتاج إلى من يوجهها ويعطيها كلمة تشجيع لكي تستطيع الاستمرار والمضي قدماً ، فمثلاً عندي طالبة أحبها جداً اسمها "آيه" تبلغ من العمر 11سنة تكتب كلمات معانيها جميلة ، ربما لا تكون شعر ولكنها تمثل معاني رقيقة ، فمثلا تقول:

شفاه وورد وريحان

قطفت من الجنان

هديتها لأعز إنسان

وقابلت من ملكت الجفنان

فتحت عيني وجدتها

مثل الزهرة والريحان

..........

ويوجد غيرها كثير لهم مشاعر جميلة وطموح وأفكار ومشاريع للمستقبل تحتاج منا الاهتمام وأن نستمع إليهم بجد لكي يكون هناك أمل في غد أفضل لنا جميعاً.

عمر البراءة

2008-10-07T18:06:00.008+02:00

خرجت انا واختى نشتري ملابس العيد لأطفالها الثلاثة ، وكان من حظي ان حملت "زينب" الرضيعة ذات السبعة اشهر ، وفي الطريق إذا بزينب فجأة تمسك اصبعى بكل يدها الرقيقة تريد ان تضعه في فمها الصغير ، تخيلوا أطبقت على اصبعي بكل يدها ولم تستطيع السيطرة عليه بالكامل ، ما هذه البراءة ، وماهذا الجمال!!!!!

تركتها تحاول السيطرة على اصبعى وشردت بذهنى .... يااااه لقد ذكرتني بعمر البراءة ، انظر اليها وهي تكتشف العالم من حولها بعينيها الجميلة وفمها الرقيق - حيث ان اصبعى الان اصبح في فمها ، ياله من احساس جميل وانا اشعر بمنبت اسنانها وهو يدغدغ اصبعي - تركتها تلعب وسألت نفسي أمازالت بي بعض هذه البراءة أم أن السنين فعلت فعلتها معي وبدأت في أخذها منى ؟؟

لا أذكر بالتحديد متى بدأت أفقد هذه البراءة ، كل شئ اصبح مشوه ،وغريب ، لقد اصبحت اشك في كل شئ ، ولا اثق بأي شخص ، آه كم احسدك يازينب فاحتياجاتك في هذه الدنيا بسيطة وجميلة بقدر جمال ورقة عينيكِ وأقل الأشياء ترضيكِ ، ولكن نحن نجري ونلهث وراء تحقيق خططنا وأحلامنا وطموحاتنا ومحاولة العثور على سعادتنا الهاربة ، ولكنه الزمن الذي لابد وأن يترك آثاره فينا ، ستكبري وتدركي كم كنتِ بريئة وجميلة .....

بعد انتهاء رحلتى كانت زينب قد تعتبت من عملية الاكتشاف ، فالمثيرات كثيرة من حولها فنامت كالملاك بين يدي...

عن السعادة

2008-09-19T23:59:00.004+02:00

قال عبد الرحمن بدوي:

"فالوجود شقي بطبعه ... وسيظل شقيا ، لأن الامكانيات لا متناهية ، واللا متناهي لا يمكن اجتيازه ، فإذا كانت السعادة الكلية لن تتحق إلا بإحراز الكل ، وإحراز الكل معناه اجتياز اللامتناهي ، واجتياز اللامتناهي مستحيل ، فالسعادة الكلية - إذن - مستحيلة."

إذا سألتني ما الذي يجلب لك السعادة ؟؟ سأجاوبك ببساطة : لا أعرف بالتحديد!!!!

أعتقد - في رأيي الشخصي - أن السعادة شئ نسبي ولحظي ، بمعنى ان مايسعدك اليوم ، بل الآن في هذه اللحظة ، من الممكن ألا يعطيك نفس الشعور بعد لحظة واحدة فقط .....

لا أعرف إن كان هناك من يتفق معي ، ولكن هذا ما يحدث معي ...

ولكني اكتشفت - إن صح التعبير - أن هناك أشياء تشعرني بوجودي كإنسانة ، ولا أعتقد أني أستطيع الاستغناء عنها في حياتي ، بالطبع نجاحى في عملي ، حب الاخرين ، "المغامرون الخمسة" اولاد اخواتي ، واشياء اخرى...

إذا كانت السعادة الكلية مستحيلة ، فما رأيكم زوار مدونتى المتواضعة ان تشاركوني الرأي في موضوع "السعادة" ، ما الذي يسعد كل واحد منكم؟

وأشكركم جميعا لأنكم تشعروني بسعادة غامرة.

سميرة

القيم ثابتة ولا.....

2008-09-13T23:56:00.005+02:00

كنت مرة قرأت من زمان لراجل بيقولوا عليه فيلسوف اسمه "نيتشه" مقولة فيما معناها: "إن القيم شئ غير ثابت لأنها من صنع الانسان لذلك هي متغيرة" طبعاً النص مش كدا بالظبط ....

أول ما قرأت الكلام ما عجبنيش خااااالص ، أنا كان عندي وقتها حوالي 16 أو 17 سنة يعني لسه خضرا ، قلت ازاي؟؟ القيم شئ ثابت ومطلق وأبدي ، وكنت مؤمنة جداً برأيي ....

لما بقى نزلت للشغل واحتكيت بأنواع كتير م البشر لقيت ان عمنا "نيتشه" كان عنده حق ، آه عنده حق ، هي فين القيم والمبادئ اللي الناس بتتعامل على أساسها ، لا يوجد !!!!!

في عالمنا دا ، كل اللي عاوز يعمل حاجة يتوكل على الله ويعملها ، المهم تكون في إطار القانون ، يعني اعمل اللي في نفسك والقانون هايحميك ، ولا يهمك ...... "زمن الفوضى"

القيمة اللي ملاحظة انها ظاهرة اوي اليومين دول "أنا ومن بعدي الطوفان" يعني ببساطة علشان تعرف تعيش في القرية ، قصدي الغابة الصغيرة كن أناني أو نفعي لكي تحيا..

أنا بقى كنت ساذجة اوي ، كنت بانية لنفسي عالم مثالي شفاف وجميل وحالم من القيم والمبادئ ، لكن اصطدامي بالواقع الأليم أثر جدا في نفسيتي في الأول ، بس دلوقتي خلاص اتعلمت أو بمعنى آخر اتعودت على ندالة البشر.

2008-09-01T21:22:00.000+02:00

الذكرى السنوية الـ26

اليوم: الاثنين

التاريخ: 1-9-2008م / 1-رمضان(9)-1429هـ

المناسبة: ذكرى ميلادي الـ 26

النهاردة كان يوم طويل اوي في الشغل ، بالاضافة إلى انه اول يوم في رمضان فكان يوم صعب شوية ، واللي زود من صعوبة اليوم ذكرى ميلادي.

يااااااااه انا بقى عندي 26سنة ، ياترى انا - سميرة - عملت ايه في حياتي مهم في الـ25 سنة اللي فاتت ؟؟؟؟ سؤال سألته لنفسي طول النهار النهاردة ...

كانت الاجابة صعبة شوية ، فيه حاجات عملتها وراضية عنها وحاجات اكتر كان نفسي اعملها ومش عارفة ماعملتهاش ليه ؟؟؟

ليه الانسان بيقعد يؤجل في احلامه ويقول بكره ، السنة الجاية ، بعدين ، وليه مش دلوقتى ، الآن، حالاً ، سؤال بسأله لنفسي ومش لاقيه له اجابة ، بنأجل أحلامنا لييييييييييه؟؟؟؟؟؟

يمكن كل واحد مننا له ظروفه اللي علشانها بيقعد يؤجل لغاية ان في النهاية مافيش حاجة بتتحقق او بتحصل ، لكن انا بسمع الناس بتقول احنا اللي بنخلق الظروف دي ، احنا اللي بنخطط لحياتنا ، احنا اللي بنصنع مستقبلنا ، لكن للاسف انا ماعرفتش او ما ادركتش دا إلا متأخر حبتين ، انا سِبت الدنيا تمشيني على مزاجها ، زي اللي ما بيعرفش يعوم وخلاص هايغرق واستسلم وساب التيار يوديه مطرح ماهو عاوز ، لغاية ما يلاقي القشة اللى يتعلق بيها ومابيصدق يلاقيها ، هي دي اللي تفوقه وتصحيه وتقوله : لأ انت انسان وحياتك غالية ، وهاتعيش مرة واحدة بس ، حارب وقاتل علشان تعيش !!

بس الانسان دا لسه برضه حاسس ان فيه حاجة مكتفاه مش عارف هي ايه بالظبط؟؟؟؟ يمكن قلة ثقة في نفسه ، وفي امكانياته - مع ان كل الناس بتقوله انه انسان فظيع ، وشاطر ومجتهد ، بس هو مش عاوز يصدق نفسه ، ويثق في امكانياته ، دايما منتظر اللي يعطيه دفعة معنوية ويحطه تاني ع الطريق لما يقع ، او يفقد الثقة في نفسه ، بس لغاية امتى؟؟؟؟

لازم الانسان يبدأ يتغير بقى ، لازم يثور على وضعه المؤسف اللي عايش فيه ، والجو الكئيب اللي معيش نفسه فيه ، الحياه مش هاتستناه ، يالا بقى بسرعة ، قوم خطط لحياتك ، واعرف انت عاوز ايه بالضبط ؟؟؟ واكيد لما تعرف هاتوصل يا انسان.

داكان حوار بين سميرة اللي الناس شايفاها ، وسميرة اللي ما حدش بيشوفها او يعرفها.

بس بالرغم من هذا الحوار الفظيع النهاردة ماكنش يوم سوداوي اوي ، جميل ان يكون عيد ميلادك اول يوم رمضان ، ورمضان بالنسبة لي له ريحة خاصة جداً ، بحب الزحمة قبل الفطار ، وانك ترجع البيت يادوب على صوت مدفع الافطار ، وكمان الشارع بيكون هادي وجميل اوي ساعة الفطار....

اكيد الحياة فيها تجارب كتير لازم نحاول نعيشها على قد ما نقدر، وكل واحد على قد امكانياته وطموحه..

رمضان كريم

2008-08-20T22:41:00.000+03:00

الاتوبيس في مصر سنة ......

في احلامك

2008-08-20T22:37:00.000+03:00

يااااه ع النظام

2008-08-20T22:29:00.000+03:00

يبقى انت اكيد اكيد في مصر

ترم ترم ترم ترم

2008-08-11T23:35:00.000+03:00

أيوه... الأجرة يا حضرات

كلمة شاعرية ، كلها نغم وحنية ، دايماً بتسمعها أخي المواطن ، أختي المواطنة من التباع لما تركب الأتوبيس. وهذا نظام معمول به فقط وحصرياً في ج.م.ع من أيام الفراعنة وبالتحديد مع بداية حكم الملك مينا اللي وّحد قطاري الصعيد في العيد ، يعني حقوق النشر والطبع محفوظة للملك مينا ربنا يعلي مراتبه. وفيه بقى طريقتين لدفع الأجرة:
الطريقة الأولى : وهي الأجرة مقابل ورقة ، يعني تدفع الأجرة تاخد تذكرة ودي طريقة بتعملها حكومتنا الغراء - حفظها الله من كل سوء - علشان المواطن الغلبان المسكين ما يحسش ان فلوسه ضاعت أو دفعها في الهوا ، واهو ياخد ورقة تبين حقه الدستوري إنه دفع الأجرة ، وخلي بالكم دي مش أي ورقة دي تذكرة وكمان تذكرة دلع ع الآخر يعني كفاية ألوانها الجميلة ايشي فوشية وايشي بمبي وايشي فُحلقي ، يعني ما تحاولش تستهتر بالورقة ، وطبعا الناس بتاخد الورقة- اسفة التذكرة - من هنا وتلاقي شلالات من الورق خارجة من شباك الاتوبيس على طول ، وتلاقي التباع اللي بيسلمك ورقتك دايما بيحط القلم ورا ودنه ليه مش عارفة؟؟؟
اما بقى الطريقة الثانية : فهي طريقة يا الدفع يا الدفع ، ودا نظام معمول به في الميكروباصات خصوصاً ، وفي هذه الطريقة الرائعة دايماً الاجرة بتكون 55قرش أو 65 أو 85 ، أهو اي حاجة فيها خمسة وخلاص ، ليه بقى؟ علشان يكون فيه باقي شلن أو بريزة ، وطبعا يا شطار الباقي بيكون من نصيب مين ؟؟؟؟ ها سيب الاجابة ليكم ولو عرفت الاجابة الصحيحة اتصل بـ090099999 والجايزة اشتراك مجاني لمدة شهر في مكان مميز ع الحديدة تمنحه لكم وزارة المواصلات . وفي مرة يا إخواني تجرأت وطالبت بحقي في باقي الأجرة - عادي يعني دا حقي - ويا ريتني ما طلبتها ، لقيت كل الناس بتبص لي وكأني عاملة حاجة غلط ، ولاقيت كدا سبحان الله التباع وشه قلب 100لون وتخن صوته وقالي مفيش فكة يا أبلة وطبعا مع هذا المشهد المرعب ولا أفلام هتشكوك ، لم أستطع إلا أن اسكت واكتم خالص ولا نفس ولا حركة ونزلت وجريت بسرعة أول ما الاتوبيس وقف وسط الشارع.
وكان هذا شرح مبسط لطرق دفع الأجرة في الاتوبيس ، ويارب تكونوا فهمتوا حاجة علشان انا اموووت وافهم.

2008-08-05T21:31:00.001+03:00

الاخت الغالية zianour بعثت إلى بواجب - مع ان المدارس لسه عليها شوية واحنا كبرنا ع الموضوع دا - ادعوا لي ربنا يوفقني واقدر احل الواجب ....
س: اذكر اسم من طلب منك حل هذا الواجب ؟؟
ج: من اولها كدا سؤال صعب ، بس يا ترى اجباري ولا اختياري ؟؟؟ عموما انتوا عارفين الاجابة ...
س: اذكر القوانين المتعلقة بهذا الواجب ؟
ج: والله يا اخواني اخر قانون فاكراه كان قانون الطفو لارشميدس ، ودا كان من زمان - مش اوي يعني - في الفيزياء ايام ما كانت الامتحانات بتيجي سهلة ، طبعا الكل فاهم قصدي كويس اوي.....
س: تحدث عن ستة اسرار قد لا يكتشفها من يقابلك للمرة الاولى؟؟؟
اهو دا بقى اللي ما تفقناش عليه بس ها حاول افكر اهو لسه بدري على لم الورق ونهاية اللجنة ، للأسف نسيت البرشام بتاع السؤال دا بالذات
* ممكن يفتكر اني غلسة او مش اجتماعية
* يعتقد اني ما بفهمش اي حاجة في اي حاجة ، بصراحة انا بتعمد اعمل كدا بعض الاوقات خصوصا لما تكون القعدة مش عاجبانني ، كنت قرأت مرة مقولة "من الذكاء ان تبدو غبيا في بعض المواقف" ما عرفش مين اللي قالها.
* ما يعرفش ان انا عندي بعض الفراسة ، يعني انا فصصته م الاخر كدا وحللت شخصيته من اول قعدتين.
* الناس بتعتقد ان انا هادية جدا في اول عشر مرات يشفوني فيها والعكس صحيح.
* ان انا بحب القراءة جدا ودا طبعا من البلاهة اللي بتبقى باينة على وشي.
* طبعا ما فيش حد يعرف اني بموت في الميكانيكا جدا جدا جدا (غير قلة قليلة من المقربين)
* فيه ناس كتييير ما تعرفش اني بموووت في اللون الاخضر (ملحوظة حسيت اني لازم اقولها مش عارفة لي؟)
س:حول هذا الواجب إلى ستة مدونين ...
اهي الجزئية دي بقى بالذات مش عندنا في المنهج.

2008-08-05T10:33:00.000+03:00

الصورة دي بقى عجبتني ، اخويا نزلها من ع النت ومكتوب تحتها تعليق جميل ألا وهو

ONLY IN EGYPT

2008-08-03T21:36:00.000+03:00

سواق الاتوبيس...

لا ما تفهموش غلط دا مش فيلم المبدع (عاطف الطيب) ، انما دا بقى ملاحظتى المتعمقة للسواقين عموما وسائقي الاتوبيسات بوجه خاص ، بص بقى يا سيدي ، صلى على رسول الله ، السواقين دول بقى اشكال والوان منهم اللي باين عليه المهنة اوي وهو والعربية اللي راكبها واحد يعني هدومه وايديه لون الزيت والسولار ودا مش عاوزينه ، ومنهم السواق اللى مهتم بنفسه لزوم الشغل ، ودا اللى احنا عاوزينه...
99% من السائقين بيهتموا اوي بطقم الصوت والسماعات في الاتوبيس وتلاقي الساعات مرشقة في كل مكان في سقف الاتوبيس "فوق الحديدة" ،، حاجة غريبة اوي سبحان الله تركب مع اي سواق من دول الصبح بدري تلاقيه مشغل القرآن على سورة يوسف بالذات مش عارفة ليه؟؟؟ تقول السواق دا ياما هنا ياما هناك ، في حين انت لو ركبت معاه هو نفسه بعد الضهر تلاقيه مشغل اغاني على كحه وسيد الاعور وغيرهم - وساعات يا جماعة علشان ما نظلمش بيشغلوا الحاج تامر والاخت شيرين ومن على شاكلتهم - المهم ان السواقين دول اصحاب مزاج امال ايه !! ما الراجل طول النهار والليل قاعد ع الكرسي ما بيتحركش لازم ينعنش نفسه برده ، اهم حاجة بقى ان فيه سواقين بيحجزوا الكرسي اللي قدام للمُزز - طبعا مش كلهم علشان ما نظلمش حد - اهو الراجل برده يحب يشوف خِلق حلوه تفتح النفس علشان يسوق بمزاج مش ها يبقى هنا وفي البيت ، واذا جت واحدة على قد حالها زي حالاتي واتجرأت وحاولت تركب قدام يجي التباع بسرعة يقول لها الكرسي محجوز يا أبلة ... واذ فجأة تيجي مُزة حلوة تلاقي سبحان الله الباب قدام اتفتح وكله بقى زي الفل...
واذا صادفت وركبت جنب السواق تكتشف ان السواق دا بقى فيلسوف عمره وزمانه - بجد مش هزار - تلاقيه سبحان الله فاهم كل حاجة بتحصل في البلد ويقعد يحكي ويرغي على قلبك طول الطريق على ان الجاز غلى ومش عارف ايه والحكومة والوزرا واحمد عز وغيره ، تحس بجد ان السواق عنده نظره وفلسفة في الحياة ، ومقتنع تماماً ان اي مصيبة بتحصل له سببها الحكومة حتى لو طلق مراته برده الحكومة السبب وتلاقى بقى ما لذ وطاب من الشتايم اللي قلبك يحبها ع الحكومة واعوانها ، وتلاقي السواق اذا خلص رغي يبدأ يعمل لك كشف هيئة .. الابلة في الكلية ولا بتشتغل ؟ متجوزة ولا آنسة ؟ والابلة منين ؟ اه دا احسن ناس ، لحد ما دماغي يورم ، بس انا بجد ساعات بستمتع بالكلام مع السواقين فيهم ناس كتير عندها وجهة نظر ، ومنهم اللي تقعد جنبه ولما توصل تقول الحمد لله اخيرا وصلت ، اما اسيبه يعيش حياته مع زباين غيري ....

الى اللقاء مع حلقة جديدة من حلقات الاتوبيس

2008-07-22T11:35:00.000+03:00

الحديدة ..... تاني

بصراحة بقى يا جماعة الراجل التباع "الكُمسري" بتاع الاتوبيس راجل كله نظر ومفهومية وما بيحبش موضوع الاختلاط دا ، هاتسألني ازاي ؟؟؟؟ اجاوبك يا سيدي....
الراجل دا بيقسم منطقة الوقوف جوا علبة السردين - قصدي الاتوبيس - إلى منطقتين منطقة للرجالة ومنطقة للحريم "لامؤاخذة" ودي بقى حاجة عمرك ما هاتشوفها إلا في مصر المحروسة لا تقولي اوربا والدول المتقدمة ولا امريكا ولا بلاد تركب الافيال. وكمان ايه ممنوع منعاً باتاً ان راجل يتجرأ ويقف في منطقة الحريم او يحاول يستعبط ويتشعبط في الحديدة بتاعتهم ، يعني نظام الاتوبيسات والتلزيق دا مش عندنا لا مؤاخذة ، كل واحد يلتزم بالمنطقة بتاعته احسن له وربك هو الهادي.

2008-07-19T18:04:00.000+03:00

الحــديـــدة

طبعاً هاتسألوني ايه هي الحديدة؟؟ ما هو الجهل وحش برده...
الاجابة ببساطة يا اخواني ان الحديدة هي العمود الطويل اللى موجود في سقف اتوبيسات النقل العام. اذا كنت - بعد الشر - من راكبي اتوبيسات النقل العام وصادف مرة ولقيت كرسي فاضي وقعدت ، بص كده على الناس اللي طالعة للاتوبيس وخد بالك من عنيهم رايحه فين ؟؟؟؟ ها تلاقي شئ الهي كدا الناس كله لها تطلعات فوقية يعني كله بيبص لفوق... للحديدة ، وبسرعة وفي حركة بهلوانية عصبية عضلية يلحق له مكان على الحديدة ويفضل ماسك فيها طول الطريق وكأنها هي المنقذ.
بص بقى يا سيدي الحديدة دي بقى مقامات يعني ايه ؟ يعني لو كنت من الناس اللي راضيين بقليلهم هاتمسك الحديدة بإيد واحدة والإيد الثانية ماسك بيها البطيخة ، الجرنال يعني اي حاجة معاك. ولو كنت من الناس الطموحة شوية يا سعدك وهناك لو لقيت مكان على الحديدة لإيديك الاتنين ويا سلام لو لقيت مسند كرسي فاضي وريحت عليه شويه ويا حبذا لو كانت اللي قاعدة على الكرسي بت مُزة اهي تسليك طول الطريق وتشيلك الشنطة بتاعتك ما انت ماسك الحديدة بإيديك الاتنين هاتقطع نفسك يعني!!!!
اهو في النهاية كله بيوصل وعلى رأي المثل "كل الطرق تؤدي إلى روما"، بس المهم الطريقة يعني بحديدة ، من غيرها كله بيوصل.

2008-05-04T19:46:00.000+03:00

قبل اي شئ نقول بسم الله والصلاة والسلام على رسول الله ... الو الو الو 1 2 3 المايك شكله مش شغال ولا ايه ، عموماً اقول لكل اللي هايفكر يفتح المكتوب بتاعي شكرا وارجو ان تعلق على كل شئ بصراحة (بس مش قوي )

يا رب المدونة خاصتي تعجبكم ولسيادتكم جزيل الشكر

مقدمه لسيادتكم

سميرة من مصر المحروسة

كيف الحال

صوت جميل

ف الميدان

شعار زيزي

حب الآخرين

اول مرة

الفعل

انا هنا

سؤالات

فـــرح

الأمان

بدون عنوان

سنة جديدة

إعلان

اهو انا؟

وجوه عديدة للحقيقة

عمر البراءة

عن السعادة

القيم ثابتة ولا.....