الحديدة ..... تاني

بصراحة بقى يا جماعة الراجل التباع "الكُمسري" بتاع الاتوبيس راجل كله نظر ومفهومية وما بيحبش موضوع الاختلاط دا ، هاتسألني ازاي ؟؟؟؟ اجاوبك يا سيدي....
الراجل دا بيقسم منطقة الوقوف جوا علبة السردين - قصدي الاتوبيس - إلى منطقتين منطقة للرجالة ومنطقة للحريم "لامؤاخذة" ودي بقى حاجة عمرك ما هاتشوفها إلا في مصر المحروسة لا تقولي اوربا والدول المتقدمة ولا امريكا ولا بلاد تركب الافيال. وكمان ايه ممنوع منعاً باتاً ان راجل يتجرأ ويقف في منطقة الحريم او يحاول يستعبط ويتشعبط في الحديدة بتاعتهم ، يعني نظام الاتوبيسات والتلزيق دا مش عندنا لا مؤاخذة ، كل واحد يلتزم بالمنطقة بتاعته احسن له وربك هو الهادي.

الحــديـــدة

طبعاً هاتسألوني ايه هي الحديدة؟؟ ما هو الجهل وحش برده...
الاجابة ببساطة يا اخواني ان الحديدة هي العمود الطويل اللى موجود في سقف اتوبيسات النقل العام. اذا كنت - بعد الشر - من راكبي اتوبيسات النقل العام وصادف مرة ولقيت كرسي فاضي وقعدت ، بص كده على الناس اللي طالعة للاتوبيس وخد بالك من عنيهم رايحه فين ؟؟؟؟ ها تلاقي شئ الهي كدا الناس كله لها تطلعات فوقية يعني كله بيبص لفوق... للحديدة ، وبسرعة وفي حركة بهلوانية عصبية عضلية يلحق له مكان على الحديدة ويفضل ماسك فيها طول الطريق وكأنها هي المنقذ.
بص بقى يا سيدي الحديدة دي بقى مقامات يعني ايه ؟ يعني لو كنت من الناس اللي راضيين بقليلهم هاتمسك الحديدة بإيد واحدة والإيد الثانية ماسك بيها البطيخة ، الجرنال يعني اي حاجة معاك. ولو كنت من الناس الطموحة شوية يا سعدك وهناك لو لقيت مكان على الحديدة لإيديك الاتنين ويا سلام لو لقيت مسند كرسي فاضي وريحت عليه شويه ويا حبذا لو كانت اللي قاعدة على الكرسي بت مُزة اهي تسليك طول الطريق وتشيلك الشنطة بتاعتك ما انت ماسك الحديدة بإيديك الاتنين هاتقطع نفسك يعني!!!!
اهو في النهاية كله بيوصل وعلى رأي المثل "كل الطرق تؤدي إلى روما"، بس المهم الطريقة يعني بحديدة ، من غيرها كله بيوصل.