الذكرى السنوية الـ26
التاريخ: 1-9-2008م / 1-رمضان(9)-1429هـ
المناسبة: ذكرى ميلادي الـ 26
النهاردة كان يوم طويل اوي في الشغل ، بالاضافة إلى انه اول يوم في رمضان فكان يوم صعب شوية ، واللي زود من صعوبة اليوم ذكرى ميلادي.
يااااااااه انا بقى عندي 26سنة ، ياترى انا - سميرة - عملت ايه في حياتي مهم في الـ25 سنة اللي فاتت ؟؟؟؟ سؤال سألته لنفسي طول النهار النهاردة ...
كانت الاجابة صعبة شوية ، فيه حاجات عملتها وراضية عنها وحاجات اكتر كان نفسي اعملها ومش عارفة ماعملتهاش ليه ؟؟؟
ليه الانسان بيقعد يؤجل في احلامه ويقول بكره ، السنة الجاية ، بعدين ، وليه مش دلوقتى ، الآن، حالاً ، سؤال بسأله لنفسي ومش لاقيه له اجابة ، بنأجل أحلامنا لييييييييييه؟؟؟؟؟؟
يمكن كل واحد مننا له ظروفه اللي علشانها بيقعد يؤجل لغاية ان في النهاية مافيش حاجة بتتحقق او بتحصل ، لكن انا بسمع الناس بتقول احنا اللي بنخلق الظروف دي ، احنا اللي بنخطط لحياتنا ، احنا اللي بنصنع مستقبلنا ، لكن للاسف انا ماعرفتش او ما ادركتش دا إلا متأخر حبتين ، انا سِبت الدنيا تمشيني على مزاجها ، زي اللي ما بيعرفش يعوم وخلاص هايغرق واستسلم وساب التيار يوديه مطرح ماهو عاوز ، لغاية ما يلاقي القشة اللى يتعلق بيها ومابيصدق يلاقيها ، هي دي اللي تفوقه وتصحيه وتقوله : لأ انت انسان وحياتك غالية ، وهاتعيش مرة واحدة بس ، حارب وقاتل علشان تعيش !!
بس الانسان دا لسه برضه حاسس ان فيه حاجة مكتفاه مش عارف هي ايه بالظبط؟؟؟؟ يمكن قلة ثقة في نفسه ، وفي امكانياته - مع ان كل الناس بتقوله انه انسان فظيع ، وشاطر ومجتهد ، بس هو مش عاوز يصدق نفسه ، ويثق في امكانياته ، دايما منتظر اللي يعطيه دفعة معنوية ويحطه تاني ع الطريق لما يقع ، او يفقد الثقة في نفسه ، بس لغاية امتى؟؟؟؟
لازم الانسان يبدأ يتغير بقى ، لازم يثور على وضعه المؤسف اللي عايش فيه ، والجو الكئيب اللي معيش نفسه فيه ، الحياه مش هاتستناه ، يالا بقى بسرعة ، قوم خطط لحياتك ، واعرف انت عاوز ايه بالضبط ؟؟؟ واكيد لما تعرف هاتوصل يا انسان.
داكان حوار بين سميرة اللي الناس شايفاها ، وسميرة اللي ما حدش بيشوفها او يعرفها.
بس بالرغم من هذا الحوار الفظيع النهاردة ماكنش يوم سوداوي اوي ، جميل ان يكون عيد ميلادك اول يوم رمضان ، ورمضان بالنسبة لي له ريحة خاصة جداً ، بحب الزحمة قبل الفطار ، وانك ترجع البيت يادوب على صوت مدفع الافطار ، وكمان الشارع بيكون هادي وجميل اوي ساعة الفطار....
اكيد الحياة فيها تجارب كتير لازم نحاول نعيشها على قد ما نقدر، وكل واحد على قد امكانياته وطموحه..
رمضان كريم
