الأربعاء، ٢٠ أغسطس ٢٠٠٨

الاتوبيس في مصر سنة ......
في احلامك


يااااه ع النظام

يبقى انت اكيد اكيد في مصر

ترم ترم ترم ترم

الاثنين، ١١ أغسطس ٢٠٠٨

أيوه... الأجرة يا حضرات
كلمة شاعرية ، كلها نغم وحنية ، دايماً بتسمعها أخي المواطن ، أختي المواطنة من التباع لما تركب الأتوبيس. وهذا نظام معمول به فقط وحصرياً في ج.م.ع من أيام الفراعنة وبالتحديد مع بداية حكم الملك مينا اللي وّحد قطاري الصعيد في العيد ، يعني حقوق النشر والطبع محفوظة للملك مينا ربنا يعلي مراتبه. وفيه بقى طريقتين لدفع الأجرة:
الطريقة الأولى : وهي الأجرة مقابل ورقة ، يعني تدفع الأجرة تاخد تذكرة ودي طريقة بتعملها حكومتنا الغراء - حفظها الله من كل سوء - علشان المواطن الغلبان المسكين ما يحسش ان فلوسه ضاعت أو دفعها في الهوا ، واهو ياخد ورقة تبين حقه الدستوري إنه دفع الأجرة ، وخلي بالكم دي مش أي ورقة دي تذكرة وكمان تذكرة دلع ع الآخر يعني كفاية ألوانها الجميلة ايشي فوشية وايشي بمبي وايشي فُحلقي ، يعني ما تحاولش تستهتر بالورقة ، وطبعا الناس بتاخد الورقة- اسفة التذكرة - من هنا وتلاقي شلالات من الورق خارجة من شباك الاتوبيس على طول ، وتلاقي التباع اللي بيسلمك ورقتك دايما بيحط القلم ورا ودنه ليه مش عارفة؟؟؟
اما بقى الطريقة الثانية : فهي طريقة يا الدفع يا الدفع ، ودا نظام معمول به في الميكروباصات خصوصاً ، وفي هذه الطريقة الرائعة دايماً الاجرة بتكون 55قرش أو 65 أو 85 ، أهو اي حاجة فيها خمسة وخلاص ، ليه بقى؟ علشان يكون فيه باقي شلن أو بريزة ، وطبعا يا شطار الباقي بيكون من نصيب مين ؟؟؟؟ ها سيب الاجابة ليكم ولو عرفت الاجابة الصحيحة اتصل بـ090099999 والجايزة اشتراك مجاني لمدة شهر في مكان مميز ع الحديدة تمنحه لكم وزارة المواصلات . وفي مرة يا إخواني تجرأت وطالبت بحقي في باقي الأجرة - عادي يعني دا حقي - ويا ريتني ما طلبتها ، لقيت كل الناس بتبص لي وكأني عاملة حاجة غلط ، ولاقيت كدا سبحان الله التباع وشه قلب 100لون وتخن صوته وقالي مفيش فكة يا أبلة وطبعا مع هذا المشهد المرعب ولا أفلام هتشكوك ، لم أستطع إلا أن اسكت واكتم خالص ولا نفس ولا حركة ونزلت وجريت بسرعة أول ما الاتوبيس وقف وسط الشارع.
وكان هذا شرح مبسط لطرق دفع الأجرة في الاتوبيس ، ويارب تكونوا فهمتوا حاجة علشان انا اموووت وافهم.

الثلاثاء، ٥ أغسطس ٢٠٠٨

الاخت الغالية zianour بعثت إلى بواجب - مع ان المدارس لسه عليها شوية واحنا كبرنا ع الموضوع دا - ادعوا لي ربنا يوفقني واقدر احل الواجب ....
س: اذكر اسم من طلب منك حل هذا الواجب ؟؟
ج: من اولها كدا سؤال صعب ، بس يا ترى اجباري ولا اختياري ؟؟؟ عموما انتوا عارفين الاجابة ...
س: اذكر القوانين المتعلقة بهذا الواجب ؟
ج: والله يا اخواني اخر قانون فاكراه كان قانون الطفو لارشميدس ، ودا كان من زمان - مش اوي يعني - في الفيزياء ايام ما كانت الامتحانات بتيجي سهلة ، طبعا الكل فاهم قصدي كويس اوي.....
س: تحدث عن ستة اسرار قد لا يكتشفها من يقابلك للمرة الاولى؟؟؟
اهو دا بقى اللي ما تفقناش عليه بس ها حاول افكر اهو لسه بدري على لم الورق ونهاية اللجنة ، للأسف نسيت البرشام بتاع السؤال دا بالذات
* ممكن يفتكر اني غلسة او مش اجتماعية
* يعتقد اني ما بفهمش اي حاجة في اي حاجة ، بصراحة انا بتعمد اعمل كدا بعض الاوقات خصوصا لما تكون القعدة مش عاجبانني ، كنت قرأت مرة مقولة "من الذكاء ان تبدو غبيا في بعض المواقف" ما عرفش مين اللي قالها.
* ما يعرفش ان انا عندي بعض الفراسة ، يعني انا فصصته م الاخر كدا وحللت شخصيته من اول قعدتين.
* الناس بتعتقد ان انا هادية جدا في اول عشر مرات يشفوني فيها والعكس صحيح.
* ان انا بحب القراءة جدا ودا طبعا من البلاهة اللي بتبقى باينة على وشي.
* طبعا ما فيش حد يعرف اني بموت في الميكانيكا جدا جدا جدا (غير قلة قليلة من المقربين)
* فيه ناس كتييير ما تعرفش اني بموووت في اللون الاخضر (ملحوظة حسيت اني لازم اقولها مش عارفة لي؟)
س:حول هذا الواجب إلى ستة مدونين ...
اهي الجزئية دي بقى بالذات مش عندنا في المنهج.
الصورة دي بقى عجبتني ، اخويا نزلها من ع النت ومكتوب تحتها تعليق جميل ألا وهو
ONLY IN EGYPT

الأحد، ٣ أغسطس ٢٠٠٨

سواق الاتوبيس...
لا ما تفهموش غلط دا مش فيلم المبدع (عاطف الطيب) ، انما دا بقى ملاحظتى المتعمقة للسواقين عموما وسائقي الاتوبيسات بوجه خاص ، بص بقى يا سيدي ، صلى على رسول الله ، السواقين دول بقى اشكال والوان منهم اللي باين عليه المهنة اوي وهو والعربية اللي راكبها واحد يعني هدومه وايديه لون الزيت والسولار ودا مش عاوزينه ، ومنهم السواق اللى مهتم بنفسه لزوم الشغل ، ودا اللى احنا عاوزينه...
99% من السائقين بيهتموا اوي بطقم الصوت والسماعات في الاتوبيس وتلاقي الساعات مرشقة في كل مكان في سقف الاتوبيس "فوق الحديدة" ،، حاجة غريبة اوي سبحان الله تركب مع اي سواق من دول الصبح بدري تلاقيه مشغل القرآن على سورة يوسف بالذات مش عارفة ليه؟؟؟ تقول السواق دا ياما هنا ياما هناك ، في حين انت لو ركبت معاه هو نفسه بعد الضهر تلاقيه مشغل اغاني على كحه وسيد الاعور وغيرهم - وساعات يا جماعة علشان ما نظلمش بيشغلوا الحاج تامر والاخت شيرين ومن على شاكلتهم - المهم ان السواقين دول اصحاب مزاج امال ايه !! ما الراجل طول النهار والليل قاعد ع الكرسي ما بيتحركش لازم ينعنش نفسه برده ، اهم حاجة بقى ان فيه سواقين بيحجزوا الكرسي اللي قدام للمُزز - طبعا مش كلهم علشان ما نظلمش حد - اهو الراجل برده يحب يشوف خِلق حلوه تفتح النفس علشان يسوق بمزاج مش ها يبقى هنا وفي البيت ، واذا جت واحدة على قد حالها زي حالاتي واتجرأت وحاولت تركب قدام يجي التباع بسرعة يقول لها الكرسي محجوز يا أبلة ... واذ فجأة تيجي مُزة حلوة تلاقي سبحان الله الباب قدام اتفتح وكله بقى زي الفل...
واذا صادفت وركبت جنب السواق تكتشف ان السواق دا بقى فيلسوف عمره وزمانه - بجد مش هزار - تلاقيه سبحان الله فاهم كل حاجة بتحصل في البلد ويقعد يحكي ويرغي على قلبك طول الطريق على ان الجاز غلى ومش عارف ايه والحكومة والوزرا واحمد عز وغيره ، تحس بجد ان السواق عنده نظره وفلسفة في الحياة ، ومقتنع تماماً ان اي مصيبة بتحصل له سببها الحكومة حتى لو طلق مراته برده الحكومة السبب وتلاقى بقى ما لذ وطاب من الشتايم اللي قلبك يحبها ع الحكومة واعوانها ، وتلاقي السواق اذا خلص رغي يبدأ يعمل لك كشف هيئة .. الابلة في الكلية ولا بتشتغل ؟ متجوزة ولا آنسة ؟ والابلة منين ؟ اه دا احسن ناس ، لحد ما دماغي يورم ، بس انا بجد ساعات بستمتع بالكلام مع السواقين فيهم ناس كتير عندها وجهة نظر ، ومنهم اللي تقعد جنبه ولما توصل تقول الحمد لله اخيرا وصلت ، اما اسيبه يعيش حياته مع زباين غيري ....
الى اللقاء مع حلقة جديدة من حلقات الاتوبيس